05.11.1999

06:30 UTC

Pekin: Në aktivitetet e ditës së fundit të vizitës së kancelarit gjerman, Gerhard Schröder në RP të Kinës bën pjesë dhe hapja e një Dhome Gjermane të Tregtisë së Jashtme në kryeqytetin kinez, Pekin. Ministri federal gjerman i ekonomisë e cilësoi hapjen e Dhomës Tregtare si një "urë lidhëse mes ekonomisë së të dy vendeve". Ai siguroi ministrin kinez të tregtisë së jashtme, Shi Guangsheng dhe zyrtarët e tjerë të lartë vendas, të pranishëm për mbështetjen e Gjermanisë në procedurat e shqyrtimit të kërkesës së Kinës për pranim në Organizatën Botërore të Tregtisë.

Grosny: Si pasojë e presionit ndërkombëtar, Moska ka lejuar sërish kalimin e një numri të madh refugjatësh çeçenë për në Republikën fqinje të Ingushetisë. Sipas njoftimeve të Komisariatit të Lartë të OKB për Refugjatë, UNHCR heqjen e bllokadave e shfrytëzuan për të kaluar në shtetin fqinj rreth 1300 ikës. Qeveria ruse bëri të ditur me këtë rast se për t´u mundësuar refugjatëve ikjen, në vijim të ditës së sotme do të hapen edhe disa posta të tjera kufitare. Një numër politikanësh perëndimorë i kanë bërë thirrje Rusisë të përpiqet për gjetjen e një zgjidhjeje politike për konfliktin në Kaukaz. Operacionet ushtarake krijojnë më shumë probleme se sa zgjidhin, u shpreh për çështjen në Washington ministri i jashtëm gjerman, Joschka Fischer pas bisedimeve të zhvilluara me sekretaren amerikane për marrëdhënjet me jashtë, Madeleine Albright. Kryeministri britanik, Toni Blair, nga ana e tij, paralajmëroi Moskën për rreziqet eventuale, me të cilat do të shoqërohej pushtimi i kryeqytetit çeçen, Grosny.

Hagë: Negociatat dhe në përgjithësi kalimi i procedurave përkatëse të pranimit të shteteve evropiano-lindore në BE shihen prej komisarit të ri evropian për çështjet e zgjerimit, Günther verheugen, si të vështira. Politikani socialdemokrat gjerman ka bërë të ditur me këtë rast, se negociatat duhen zhvilluar mbi bazën e rezultateve dhe arritjeve konkrete të secilit prej kandidatëve për anëtarësim në BE dhe jo në mënyrë emocionale dhe të motivuara prej mëshirës e keqardhjes. Ruajtjes së kësaj linje i shërben edhe tendenca për moszbutjen e kritereve të pranimit dhe rrespektimin e tyre prej të gjithë numrit të madh të personave përgjegjës për shqyrtimin e kërkesave për anëtarësim.

Washington: Sekretarja amerikane e shtetit për marrëdhënjet me jashtë, Madeleine Albright u ka bërë thirrje të dy palëve negociuese në çështjen e dëmshpërblimit të të dënuarve me punë të detyruar të kohës së nacionalsocializmit, për më shumë fleksibilitet. Pas bisedimeve të zhvilluara me ministrin gjerman të punëve të jashtme, Joschka Fischer, ministrja vuri në dukje se fleksibiliteti në bisedime është rruga e vetme për arritjen e rezultateve konkrete. Fischer, nga e tij, bëri të njohur qëndrimin e qeverisë federale gjermane për të mos bllokuar zbatimin e rezultatit të kompromisit, nëse një i tillë do të arrihej. Përfaqësuesi i qeverisë federale gjermane në bisedime, Otto Graf Lambsdorf takohet sot me atë amerikan, Stuart Eizenstat, për të diskutuar sërish rreth gjetjes së një zgjidhjeje të pranueshme për të gjitha palët. Lambsdorff kishte paraljmëruar më parë dështimin e negociatave, në rast të mosrritjes së ofertës gjermane. Në këtë kuadër dy senatorë amerikanë paraqitën një projektligj, i cili parashikon shtyrjen e afatit të parashkrimit apo të vjetërimit të kërkesave të viktimave të nacionalsocializmit.

Bonn: Sot përfundon në Bonn pas dymbëdhjetë ditë konsultash konferenca ndërkombëtare për çështjet e mjedisit. Çështjet themelore, të trajtuara por të pazgjidhura në Marrëveshjen e Kyotos, kryesisht për reduktimin e emetimit të gazrave të çliruara brenda dukurisë klimatike të mbiquajtur "efekti i serës" vazhdojnë të mebten të hapura. Pavarësisht nga kjo bilanci i ministrit gjerman për çështjet e mjedisit, Jürgen Trittin është pozitiv. Konferenca ia arriti të sqaronte një numër jo të vogël çështjesh teknike, të parashikuara në rendin e ditës, ndërkohë që shumica e pjesëmarrësve u shpreh e gatshme për ratifikimin protokollin e Marrëveshjes së Kyotos. I një linje tjetër është vlerësimi i shoqatave ndërkombëtare dhe gjermane të ruajtjes së mjedisit, për të cilat punimet e konferencës dhe para së gjithash rezultatet e saj lanë shumë për të dëshiruar. Ministri federal për çështjet e mjedisit, Jürgen Trittin jep sot në Bundestagun gjerman në Berlin një deklaratë qeveritare lidhur me rezultatet e konsultave 12-ditore.

Tel Aviv: Kryeministri aktual izraelit, Ehud barak ka rikonfirmuar katër vjet pas vrasjes së ish-kryeministrit Yitzak Rabin vendosmërinë dhe vullnetin e tij për vazhdimin e kursit të procesit dhe bisedimeve të paqës, filluar prej Rabin. Barak ribëri prezent pozicionin e tij në fjalën e mbajtur në një ceromoni përkujtimore të organizuar me këtë rast në kryeqytetin izraelit, tel Aviv, në praninë e rreth 100 000 pjesëmarrësve. Duke iu referuar arritjes së një marrëveshjeje përfundimtare të paqës me palestinezët, Barak theksoi se ora e vendimit sa vjen e bëhet më e afërt. Fjala e mbajtur pasoi inaugurimin e një monumenti përkujtimor, në vendin ku para katër vjetësh u krye atentati ndaj ish-kryeministrit izraelit dhe nobelistit të paqës, Yitzak Rabin.

Romë: Papa Gjon Pali i Dytë mbërrin sot për një vizitë dyditore në Indi. Besimtarët fundamentalistë induistë, të cilët e kanë kritikuar ashpër vizitën, kërkojnë t´u vihet fre konvertimeve të nxitura prej përhapjes së katolicizmit në vend si dhe kanë paralajmëruar për sot një protestë kundër vizitës së Papës në vend. Katolikët përbëjnë vetëm 2% të popullsisë indiane, e cila në shumicën e saj dërrmuese i përket besimit induist. Pas qëndimit të tij në Indi kreu i kishës katolike do të vazhdojë udhëtimin për në republikën kaukaziane të Gjeorgjisë.